Ғылым мықты болса, мемлекет те қуатты болады.
Қасым-Жомарт Тоқаев
12 сәуір – Ғылым қызметкерлері күні
Жыл сайын сәуір айында елімізде дәстүрлі түрде ғылым қызметкерлерінің мерекесі аталып өтеді. Бұл күн кездейсоқ таңдалмаған. 12 сәуір – дәл осы күні көрнекті қазақстандық ғалым-геолог, Қазақстан Ғылым Академиясының тұңғыш Президенті Қаныш Сәтбаев дүниеге келген болатын. Биыл еліміз ғұлама ғалым Қаныш Сәтбаевтың 125 жылдығын және көрнекті ақын, қоғам қайраткері Ілияс Жансүгіровтің 130 жылдық мерейтойын тойлайды.
Құрметті әріптестер!
Әл-Фараби бабамыз «Ғылымы жоқ елдің болашағы бұлыңғыр» деген екен. Осы орайда, ғылым қызметкерлері – университеттің жүрегі мен жаны десек қателеспейміз.
Атқарған жұмыстарыңыздың нәтижесі – университеттің барлық жетістіктерінің негізі. Өйткені сіздердің зерттеулеріңіз арқылы білім шекарасы кеңейеді. Маңызды мәселелерді шешудің жаңа жолдары анықталады және қоғам дамиды.
Қазіргі таңда университетте 2 диссертациялық кеңес жұмыс істейді. Университет 7 гранттық қаржыландыру жобасын табысты іске асыруда. «Горизонт» бағдарламасы аясында 2 халықаралық жобаны Еуропалық комиссия қаржыландырады. Сондай-ақ, ғылыми және (немесе) ғылыми-техникалық қызмет нәтижелерін коммерцияландыру жобасы орындалуда. «JAS ǴALYM» байқауы бойынша 32 жоба және 100 стартап-жобасы қаржыландырылды.
Ғылыми-зерттеу жұмыстарының нәтижесінде прототиптер, сайттар, қосымшалар жасалды, зияткерлік меншік құжаттары алынды және рейтингтік журналдарда мақалалар жарияланды. Жыл сайын университет ғалымдарының 400-ден астам ғылыми мақалалары мен жарияланымдары жарық көреді. 2023 жылы университеттің профессорлық-педагогикалық құрамы 100-ден астам авторлық куәлік пен патент алды. Жыл сайын университет жоғары рейтингті журналдарда мақала жариялағаны үшін ғалымдар мен білім алушыларға сыйақы береді. Өткен жылы 25 оқытушы шетелдік ғылыми тағылымдамадан өтті, оның ішінде «Болашақ» бағдарламасының «500 ғалым» жобасы аясында үздік ғылыми орталықтарда білімдерін шыңдады. Жыл сайын университеттің талантты білім алушылары республикалық және халықаралық ғылыми жобалар мен олимпиадалар конкурстарында бірінші болады.
Осы жетістіктердің барлығы – біздің ұжымның қажырлы еңбегі мен бай тәжірибесінің нәтижесі. Ғалым ардагерлер, ғылыми қызметкерлер мен жас ғалымдардың жеткен биіктері университет қауымдастығының жеңісі деп санаймын.
Ғылыми зерттеулеріңізге сәттілік, мықты денсаулық пен шалқар шабыт тілеймін!
Мереке құтты болсын!
Бөрібаев Ермек Әбілтайұлы
Басқарма Төрағасы – Ректор,
заң ғылымдарының докторы, профессор.